Y ffordd ddoethach o baratoi eich Hun ar gyfer arweinyddiaeth mewn addysg cwrs Meistr mewn arweinyddiaeth addysgol ar-lein sy'n canolbwyntio ar yrfa am £6,000

Mae’r modiwl hwn yn annog myfyrio a gwerthuso beirniadol trwy ddull sy’n seiliedig ar dystiolaeth o ymarfer a datblygiad proffesiynol parhaus. Mae’n galluogi myfyrwyr i ddatblygu eu gwybodaeth ac i wella eu sgiliau ysgrifennu, ymchwilio ac astudio, gan ddilyn confensiynau academaidd. Mae’r modiwl yn rhoi cyfle i fyfyrwyr ddadansoddi a gwerthuso llenyddiaeth, ymchwil, polisïau a datblygiadau yn eu cyd-destun proffesiynol eu hunain.

Mae’r modiwl hwn yn rhoi cyfle i fyfyrwyr archwilio a gwerthuso effaith newid yng nghyd-destun eu sefydliad addysgol. Byddant yn datblygu dealltwriaeth feirniadol o sut y gall datblygiadau polisi effeithio ar y sefydliad. Trwy ymgysylltu â thestunau cyfredol a dogfennau polisi perthnasol, bydd myfyrwyr yn dadansoddi ac yn gwerthuso materion a damcaniaethau cyfoes yn feirniadol. Mae gwybodaeth a dealltwriaeth a addysgir o themâu a materion allweddol mewn arweinyddiaeth a rheolaeth addysgol yn cynnwys damcaniaethau, gwerthoedd, arweinyddiaeth newid, strategaeth, partneriaethau a chydweithio.

Mae’r modiwl hwn yn datblygu ymwybyddiaeth feirniadol o faterion sy’n ymwneud â chynhwysiant ac anghenion dysgu ychwanegol, gan alluogi ymarferwyr myfyriol a blaengar i ddatblygu agweddau, polisïau ac arferion cadarnhaol sy’n cefnogi ymgysylltiad a chyflawniad pob unigolyn mewn lleoliadau addysg a chymunedol.

Bydd y modiwl hwn yn galluogi dysgwyr i ddangos dealltwriaeth systematig a beirniadol o rolau arweinwyr a rheolwyr mewn cyd-destun addysgol gan gyfeirio’n benodol at gysyniadau arweinyddiaeth a rheolaeth adnoddau dynol. Bydd dysgwyr yn archwilio’r gwahaniaethau rhwng rôl arweinydd a rheolwr a sut maen nhw’n croestorri wrth reoli grwpiau a thimau mewn sefydliad. Mae’r modiwl yn rhoi cyfle i werthuso’n feirniadol y rolau y mae aelodau timau’n eu chwarae a chydnabod pwysigrwydd dynameg tîm wrth arwain newid yn effeithiol. Bydd dysgwyr yn gwerthuso yn feirniadol methodolegau sy’n hwyluso dadansoddiad o dimau ac ymarferoldeb gweithio gyda thimau sy’n dylanwadu’n fewnol ac yn allanol ar y cyd-destun addysgol.

Mae’r modiwl hwn yn meithrin dealltwriaeth feirniadol o werth mentora a hyfforddi wrth ddatblygu a gwella ymarfer proffesiynol. Mae’n archwilio pwysigrwydd a phwrpas arsylwi cymheiriaid ac yn rhoi cyfle i fyfyrwyr fyfyrio’n feirniadol ar arfer addysg dda. Mae’n adnabod effeithiau posibl datblygiad proffesiynol trwy hyfforddi, mentora ac arsylwi gwersi ar godi safonau a gwella addysgeg a’r gallu i wella ansawdd dysgu ac addysgu trwy weithgaredd proffesiynol uwch.

Mae’r modiwl hwn yn galluogi myfyrwyr i ddatblygu dadansoddiad beirniadol a systematig o’r cysylltiadau rhwng astudio athroniaeth, addysg, ymchwil ac ymarfer academaidd. Bydd myfyrwyr yn gwerthuso dulliau athronyddol a damcaniaethau perthnasol sy’n dylanwadu ar addysg yn eu cyd-destun ar hyn o bryd. Bydd myfyrwyr yn myfyrio’n feirniadol ar eu gwerthoedd addysgol eu hunain a sut mae’r rhain yn gweithredu fel pwynt cyfeirio ar gyfer eu harfer eu hunain. Yn sail i’r modiwl hwn mae’r angen i fyfyrwyr fyfyrio’n feirniadol ar rôl eu safbwyntiau athronyddol personol yn eu harfer addysgol, ymchwil a dysgu proffesiynol eu hunain sy’n seiliedig ar dystiolaeth.

Mae’r modiwl hwn yn gwerthuso yn feirniadol ystyr a rôl technoleg dysgu mewn addysg. Mae’n galluogi myfyrwyr i feirniadu technoleg dysgu o fewn eu cyd-destunau a’u profiadau eu hunain trwy ddadansoddi llenyddiaeth, polisi, deddfwriaeth ac ymarfer perthnasol. Gwahoddir myfyrwyr i archwilio’n feirniadol rôl technoleg wrth wneud addysg yn hygyrch i bawb.

Mae’r modiwl hwn yn archwilio’r berthynas rhwng addysg ffurfiol, addysg anffurfiol ac addysgeg feirniadol. Mae’n archwilio’n feirniadol sut y gall addysg cael ei ddefnyddio i herio yn adeiladol anghydraddoldebau ac anghydbwysedd pŵer mewn cymdeithas. Bydd yn cynorthwyo myfyrwyr i fyfyrio ar eu hymarfer eu hunain i sicrhau eu bod yn gweithio mewn ffordd gynhwysol, ddemocrataidd a gwrth-ormesol.

Mae’r modiwl hwn yn archwilio’r fframweithiau athronyddol a damcaniaethol sy’n sail i ymchwil addysgol. Bydd myfyrwyr yn archwilio, beirniadu a gwerthuso gwahanol fethodolegau ymchwil a fydd yn cael eu hystyried wrth gynnig a chynnal y modiwl prosiect ymchwil.

O ganlyniad i astudio’r modiwl hwn, bydd myfyrwyr yn gallu cyflwyno strategaeth ymchwil gydlynol lle gallant alinio cysyniadau o athroniaeth, ontoleg ac epistemoleg er mwyn holi ac ateb cwestiwn ymchwil sy’n ymwneud â’u harfer eu hunain yn y gwaith.

Mae’r modiwl hwn yn galluogi myfyrwyr i baratoi i gymryd rhan mewn prosiect ymchwil sylweddol yn y gwaith. Bydd myfyrwyr yn gallu dangos lefel ddofn o ddealltwriaeth o wreiddiau athronyddol ymchwil addysgol trwy gynnig maes ar gyfer ymchwil, ymchwilio i gwestiwn cychwynnol a thrwy ddadlau’r achos dros ddyluniad ymchwil cydlynol ar gyfer y cwestiwn ymchwil o’u dewis.

Mae’r modiwl hwn yn galluogi myfyrwyr i gymhwyso theori ymchwil yn feirniadol ac yn systematig i ymchwil yn seiliedig ar ymarfer. Bydd myfyrwyr yn dangos y gallu i werthuso ymchwil bresennol yn feirniadol gan ddefnyddio ystod o destunau cyfredol a ffynonellau arloesol. Byddant yn casglu ac yn dadansoddi data ymchwil, gan arddangos sgiliau beirniadol dadansoddi a gwerthuso. Mae’r prosiect ymchwil hwn yn galluogi myfyrwyr i dynnu eu sgiliau at ei gilydd ar lefel Meistr i ddangos dadansoddiad beirniadol, gwerthuso, synthesis a myfyrio ar eu harfer eu hunain, gan gefnogi eu dysgu proffesiynol eu hunain yn eu cyd-destun addysgol.